Viyana de zonê Zazaki ser ju sempozyum bi!

ALİ DİKME

Viyana –“Akademiya Zonê Zazaki – Austriya“, 18ê Gağani 2015ine de, paytextê Austriya Viyana de ju sempozyum ard meydan. Na komele ni kari ra raver wertê ju serre de 10 amori perloda (pêseroka) “Raa Ma“ veti bi. Sempozyum de çar zoni amey qesey kerdene: Zazaki, İngilızki, Almanki u Tirki. Sebeta ni sempozyumi, i zonzonağê ke sılaiye kerdi bi, inu ra teyna dı teni nêamey bi.

Seate 18.00 de rae dê ni sempozyumi. Sermiyanonê “Akademiya Zonê Zazaki – Austriya“ ra Ali Dikmey ebe zonê Zazaki meymani sılam kerdi. Dikmey, hata nıka Viyana de sebeta zonê Zazaki kami çı kar kerdo, pêro ardi zon ver. Sermiyanonê komela ra MMag. Dr. Zeynep Arslane, qesey kerdena Dikmey çarnê zonanê İngilızki u Almanki.

Prof. Dr. Heiner Eichneri, no zon çutır xeleşino ra, ney sero ma rê çığıri day pıro. No zon koti ra amo, o ard zon ver. Mesut Keskin, zonê Zazaki çutır standardê xo vineno, ey sero vındet. Prof. Dr. Jaffer Sheyholislami (Şêxulislami), xeta “Skype” sera ma rê bi meyman. Kurdıstanê İraqi de Sorani u Bahdini (Kırdaski) çı hal derê, qal ard cı. Zonê ke bınê pınga zonanê binu derê, ine ser qesey kerd, Dr. Zeynep Arslane çarna Almanki. Prof. Dr. Ursula Hemeteke cüabê ni persi da: Zonu rê çı kifayetê lawuku, kılamu, qeydu esto? Prof. Dr. Katharina Briziçe, i isonê ke waxtê mektebi ke ame, zonanê xo ra benê düri, zonanê binu musenê, peyniye de zonê xo kenê xo vira, na khul sero vındete.

Ni senpozyumi de êrğatkerdoğa vırêne Dr. Zeynep Arslane biye. Ae qesê xuyo peyên vat, sempozyum xeleşiya. Şêrange zerre de beli bi ke rınd sono. Mıletê bilanu ra jêde, xort u azebi bi. Sermiyanê komele u êrğatkerdoğê ni sempozyumi nae ra zof sa bi. Zof cau ra ma rê têli amey. Pêro zof sa biyê sebeta ni kari ra.