Paytextê Austriya de Cemê Xızıri bi!

ALİ DİKME

Viyana – Paytextê Austriya Viyana de dı komelanê Aleviyo, emser Cemê Xızıri pia da gıradaene. Komela juye, “Komê Qedim-Aleviyanê Austriya” (Alt-Alevitische Glaubensgemeinschaft in Österreich-AAGÖ) biye. Na komela, gıredaiya “Föderation der Demokratische Alewiten-FEDA”wa. Nu fedarasyon, xêlê sukanê Europa de erxat dero. Komela bine, “Komê Aleviyanê Viyana” (Alevitische Gemeinde Wien) biye. Giredaiya Föderation der Aleviten Gemeinden in Österreich-AABF”a.

Seate 17:30 de cem bi top. Ravê, serdaronê ni komelo Hasan Sözeri be Ali Rıza Yıldırımi, tedıma sılam da cem u cemati. Qesey kerdena serdaro, kılm ra nia biye: “Ma ewro venga Xızıri dame. O Xızır, raveri şero feqir u fıqaru bıxelesno. İye ke tenge dere, na qır u pıro ke Kırmanciye de beno, hewarê dinu de bıreso.”

Cem de serdarê AABF Mehmet Ali Çankaya ki qesey kerd. Çankaya, nia vat: “Na Aleviyana ke nia biya parçe parçe, keşirê faydê xo çino. İta, mekane ni cemi ra venga perune dame, bêrê pêro pia ju ca de berime pêser. Phoşt jübin dime, tenena beme gırs, qesey ma tayına vereno.”

Peydona, venga piru da, va ke “Postê Heqiye sıma rê mınete keno, bêrê caê xo bijere”. Pir Rıza Yağmur be Pir Mehmet Turan, veciay huzırê cemati. Cemat ra rızalığen gurete. Gulvang da cı. Posê Heqiye kerd ra.

Pir Rıza Yağmur: “Cem u cemate ma de birayen zaf cao berz dera. Ewro ma dı pir ita têlewederime. Ez Kırmancu, pir Mehmet Turan Tırkmeno. Bırayen niara. Bırayen, çiye de rında. Tae ma ra vane ‘bırayme’, hama heto bin ra ki, koke ma vezene, ma qır kene. Na, bırayeni niya. Bırayeni, ebe raştiye bene. Ebe, zür u dalavera nêbena. Ma be mıslet Mezepotamya ra byrayme. Kes, na bırayena ma jübin ra cêra mekero. Ma, roca vırene ra iqrarê bırayen do jübin.”

Ora dıme, “des u dı xızmeti” ardi meydan. Gulvang da cı. Cem gıre da. Peynia cem de kurban u miyaji kerd vıla. Cem, ebe haşteni qedena.

…………………………….
22e Gucige 2016

NUSTE VIRENİ ...