Nara dıma internet de raê ceme!

Raa Ma –  Ju serre ra raver, na asma Nisane de ma amorê Raa Mawo vıren vet.  Ma nıka, Nisana 2015 de ju serra qu qedene. Serra dıene de ma wazeme ke pelga ma Raa Ma, internet de raê bıcero. Çıra nia keme?

  • Raa Ma, formatê ju pelge de vetene xêle emeg u waxt vazena.
  • Pelga ke vete, vıla derdene ki zametê xo zafo. Ma, zaferi teyna Vienna de vıla keme.
  • Her ju pelgê ra rengın kopi kerdene, her asme ma re masraf veceno.
  • İ isonê maê ke Austria de re, xêle teni nêşikine ebe Zazaki bıwane u bınusne.

Raa Ma ke formê ju pencerê internet de biyarime raştê, hetê ma ra ki hetê wendoğora ki tenena rındo. Sebeta interneti, pero ke ma ju asmê de xerc kerdene, ju serre de xerc keme. Nusnê ma zaferi teyna Vienna de nê, her ju caê Austria de, kotye dina de ke isonê ma este uca yene wendene. Karê pencerê interneti (gore pelge vetene) zaf zaf sıvıko.

Heto bin ra redaktorê Raa Ma Hüseyin Şimşek, wertê ni asmo de çımo ra unca emelet beno. Vienna de xora dı-hire teni este şikine Zazaki re redaktoren bıkere. Pencerê interneti, barê redaktoronê ma ki tenena keno sıvık.

İnternet de raveri, “www.facebook.com“ de ju pencerê Raa Ma ma kerd ra. Sıma ke namê Raa Ma nuşt, şikine “facebook“ de ma bıvine. Ju waxt, ma wazeme ke karê interneti nia bıberime. Ora dıma, planê ma de teyna Raa Ma re ju pencerê rakerdene ki esta. Ma wazeme ke gıran gıran şime. Çıxa isonanê ma ke nu zon musa, şinor u kesıdê karanê xo heni hira u xêle kime.

Nu are de xeberê, çirok u zarawê, makaleye ke ma hatam nıka 10 pelgo de ca da cı, ino peruna ju kıtab de ame telewe. U emeg u karo ke ju serre de ardo meydan, vind mêbo. Ma wazeme ke kıtabê Raa Ma ki xêle çeo de, xêle kıtabxano de bero vinıtene. İ isonê ke ma ra dıma yene (lac u çênekê, tornê ma) ni kari bızone.

Kam ke wazeno tarıxê, zon u kulturê xo re xızmetê bıkero, rayi zafe. Kamci raê çıçax tenena rında? Mesela nawa!

NUSTE VIRENİ ...