Raa Ma xêr ama!

MESUD KESKİN

 Albazê delali, vetoğê “Raa Ma”ê qêretkêşi, wendoğê qedırgırani, ma be xêr di!

Bultenê “Raa Ma”o ke Zonê Ma de vecino, xêr amo, pay na çımanê ma do, heni amo, ma rê mijdania xêre, tania welati, zon u zagon/kulturê ma ser tirıca tici tey arda.. Ma ke vêneme, xort u gêncê ma çıturi ebe goi u qêret merem kenê, ro kuno astanê ma, roc erzeno zerrê ma. Fêl u emelê sıma raşt şêro.

Her çıqa ke destebera mı yena, zonê ma u pi, pirık u khalıkanê xo rê xızmete kenane. Çıqa jêde bıkeri ki hunde senıko.. 20 serro ez zonê mao ke hem taê de ma, hem zonanê dina de cı rê vanê Zazaki, hem musenu, hem sero gurinu, çı waxto ki ro domananê ma universıte de hefte de reyê salıx danu. Umıd kenu ke hata peyniya emrê xo cı rê xızmeta mı vêrena.

Suka Frankfurti hetê na azet u xızmete ra cao de hewlo ke rınd ber (ürün) do. Akademisyenanê sarê Universıtê nacay de Zonê Ma u Sarê Ma sero 5 tezê doktora u jü teza masteri nuştê. nejdiyê 20 serre zonê ma ra pêseroka (dergi) Ware u Tija Sodıri itha redakte biyêne ya ki veciyêne. Enstitüyê Zazaki, ebe mordemanê ilmê zoni, senatkaran u nuskaranê ma ra pia 2004ine de na ro. Awa ke ma hetê ekonomiye ra destê ma tım tenge dero, jêde imkanê ma ki çino ke çiyo zaf gırs raurznime ra ser ya ki dezgey, pêseroki, qezetey lıngu ser bımanê. Labelê, zerrê ma de çıqa her tım çhiki bıperrê, her waxt adırê zerrê ma ki ebe umıdo de newe uncia beno gur.

Ma vênenime ke Almanya u Austriya u Holanda u İsveç u Fransa u İsviçre de, tepia metropolanê Anadoliye de u welatê ma de namê zonê ma u sarê ma ya ki mıntıqa u sukanê ma ra komeli (dernegi) benê ya, kıtabi, pêseroki, qezetey vecinê. Pêro kunete, dayağ danê ma, qêretê ma kenê jêde, dina de hurendia ma kenê qaim, zonê mao ke kıtab u nuştene de hona domanekiya xo dero, beno bıngeyin (bıngeli).

Ni zerrn u ğezna ma ra jüyê ki RAA Mawa. RAA MA xêr ama. Şiya cı zonê ma u sarê ma sera kemi mebo, a ki roşti berzo raa mawa derge ser. Raa ma sımaê, sıma raa maê. Her daim bıbê, bımanê. Na lınge xatır be sıma, hata reyna, wendoğê qedırgırani.